Bono, a xulgar por estos últimos cursos, paez que yá se ta convirtiendo en vezu anunciar esti tipu de nueves, pero un vezu bien prestosu. Y ye que, un cursu más, el nuesu cole y los nuesos escolin@s del sestu cursu, tienen una bona recompensa al so esfuerciu y trabayu. Esti añu participemos cola obra "Anovase o morrer" nel IV Certame de Teatru Escolar en Llingua Asturiana y Gallego-Asturiano que propón la Conseyería d'Educación y Cultura d'Asturies, y fuimos galardonaos col Premiu al Meyor Testu Orixinal, el Premiu al Meyor Actor (Pa David) y el Premiu al Meyor Vestuariu.
Esti añu, nun tuvimos la suerte de representar el nuesu trabayu nel Teatru de La Laboral de Xixón, pero ellí taremos el prósimu xueves 4 de mayu a les 18.00 hores na gala de recoyida de premios pa garrar los nuesos.
Amás taivos sollertes porque en breve espublizaremos les feches de les prósimes actuaciones que fadremos nos teatros de la comarca. De momentu, pa dir abriendo boca, dexámosvos el vídiu de la obra que grabemos pa participar nel certame.
¡Naguamos que vos preste!
