¡¡Puxa l'Amagüestu!!

 Esta pandemia nun ye a aplacanos les ganes de folixa y celebrar que tenemos, eso sí, cumpliendo con toles midíes de seguranza. El pasáu llunes 16 de payares, los dixebraos "grupos burbuxa" de la escuela, esfrutaron d'una serie de xeres rellacionaes cola seronda y l'Amagüestu. Fixeron una manualidá, un retratu, con frutos de la seronda, fueyes, piñes, palos...; visonaron el vídiu de la Obra Teatru del Grupu Teatru del cole que ta acabante de ganar el primer premiu "La Caleya que garró'l Pitu"; un xuegu "La Oca Asturiano" con bien d'entrugues rellacionaes cola tierrina; y pa rematar, nel recréu, comimos castañes y sidra dulce. Un amagüestu diferente pero lo importante ye siguir calteniendo les bones costumes. Equí vos dexamos un vídiu coles semeyes de la celebración. ¡Qué vos preste!

 

¡Celebrando Halloween!

 A la vuelta'l puente Tolos Santos, celebremos Halloween/Samaín na escuela. Daes les circunstancies sanitaries actuales tuvimos que facelo cumpliendo coles midíes de seguranza pero non por eso lo pasemos menos bien. La mañana tuvo enllena de mazcaritos espantibles, de xuegos nos que resolver misterios, de preparación de cócteles monstruosos y arañes delicioses pa comer, de manualidaes terrorífiques y de rises y respingos coles películes que vimos. Un Halloween diferente pero molón. Equí vos dexamos unes fotos de la mañana. ¡Qué vos presten!