Hoi día 13 de payares, tol@s escolin@s y maestres garremos el petate y marchemos caminando pa la Residencia del Montepío a celebrar en compañía de los Residentes un Amagüestu mui especial, un Amagüestu Interxeneracional. Foi una mañana enllena de bonos momentos, diversión y compañerismu. Pa entamar l'actu Pedro y Laura A. de 6º fueron los encargaos de lleer el pregón y darréu, Félix tocó un par de pieces cola gaita. Llueu, trés de les residentes (Nieves, Luisa y Sagrario) fixeron una demostración de cómo se facía la esfueya del maíz y cuntaron cosines de cuando elles yeren moces y diben a les esfoyaces; d'igual mena, esplicaron cómo se mayaben les mazanes del mou tracional pa facer sidra dulce. Los neños pudieron participar nel mayáu y na esfueya del maíz pa poder esperimentalo en primer persona. Al acabar estos talleres entamó otru nel que toos xuntos (neños y residentes) pudieron facer xuntos cucuruchos de papel de periódicu pa meter les castañes. Una vegada fechos los cucuruchos, entamaron los xuegos tradicionales y pa rematar, como nun podía ser d'otra mena, comimos toos xuntos les castañes y bebimos el zusmiu de mazana. Foi una mañana mui, mui, prestosa y equí vos dexamos un semeyes del día. ¡Qué vos presten!
No hay comentarios:
Publicar un comentario