Fin de la xira "Esto ye mundial" del Grupu Teatru CP Felechosa

 Depués de ocho funciones, pa tou tipu de públicos, el Grupu Teatru pon el ramu a la so xira 22/23 cola última función en casa, nel salón d'actos de la Residencia del Montepío de Felechosa, y amás, doblemente importante porque nella tuvimos la apaición estelar de Nieves y Domingo, dos de los Residentes que ficieron un papel piquñín na obra, enllazando asina cola cabera actividá del Proyeutu Interexeneracional Vivencies.

Una forma bien prestosa d'acabar el cursu. Pal añu que vien, más y meyor.

¡Qué esfrutéis del branu y de les merecíes vacaciones!

¡¡Arrancamos Xira Teatral!!

 El Grupu Teatru tamos de norabona una vegada más, el vienres pasáu, Día de les Lletres Asturianes, diéronnos anuncia de que la nuesa obra "Esto ye mundial" ye ganadora del Premiu al Meyor Vestuariu y del Premiu a la Meyor Direición.

Aprovechamos p'anunciar la primer función de la xira que sedrá esti xueves 11 de mayu a les 19:00 hores nel Teatru Cine Carmen de Morea pa tolos públicos y a la mañana siguiente, dos pases pa l@s escolin@s de tol conceyu.

¡Animáivos a venir!

¡¡Puxa l'Amagüestu!!

 Esta pandemia nun ye a aplacanos les ganes de folixa y celebrar que tenemos, eso sí, cumpliendo con toles midíes de seguranza. El pasáu llunes 16 de payares, los dixebraos "grupos burbuxa" de la escuela, esfrutaron d'una serie de xeres rellacionaes cola seronda y l'Amagüestu. Fixeron una manualidá, un retratu, con frutos de la seronda, fueyes, piñes, palos...; visonaron el vídiu de la Obra Teatru del Grupu Teatru del cole que ta acabante de ganar el primer premiu "La Caleya que garró'l Pitu"; un xuegu "La Oca Asturiano" con bien d'entrugues rellacionaes cola tierrina; y pa rematar, nel recréu, comimos castañes y sidra dulce. Un amagüestu diferente pero lo importante ye siguir calteniendo les bones costumes. Equí vos dexamos un vídiu coles semeyes de la celebración. ¡Qué vos preste!

 

¡Ganadores nel VII Certame de Teatru Escolar!

 Depués de los caberos meses marcaos pola situción sanitaria, que punxo pates arriba la nuesa vida y la vida de la nuesa escuela, entamamos un nuevu cursu enllenu de novedaes, pero con una mui bona noticia. Y ye que, tamos acabantes de conocer el fallu del xuráu que nos concede'l Primer Premiu na categoría d'Educación Primaria, el Premiu al Meyor Vestuariu y el Premiu a la Meyor Actriz pa Laura A, pol so papel de la Señora M, na obra "La caleya que garró'l Pitu" protagonizada pol Grupu Teatru del CP Felechosa y escrita y dirixía pola so maestra Laura.

Esti reconocimientu, ye daqué más especial qu'otros años, teniendo en cuenta les circunstancies, un tantu difíciles, que nos tocaron en plenu procesu d'ensayu y grabación de la obra. Poro, tamos percontent@s por algamar estos galardones.

Y pa que la podáis esfrutar tanto como nós, dexámosvos equí l'enllaz a la nuesa cana de YouTube pa que podáis echa-y una güeyada. ¡Qué vos preste!

Entrevista al "Grupu Teatru CP Felechosa" n'Alderiques d'Asturies

A finales del mes d'avientu, el programa Alderiques d'Asturies espublizó un reportaxe bien prestosu sobre'l teatru nes aules. Dientro d'esti reportaxe apondérase bien el trabayu que se fai nesta materia tanto na escuela de Returbiu de Mieres como na nuestra. Amás d'unes pequeñes entrevistes de los integrantes del Grupu Teatru del cursu 2018/2019. Equí vos dexamos el vídiu pa que lu esfrutéis tanto como nós.

¡¡Broche final a la Xira teatral del Grupu Teatru del CP Felechosa!!

Hoi dimos acabación, depués de munches selmanes de trabayu, a la nuesa xira teatral. La cabera función tuvo llugar a les 11.30 nel salón d'actos de la Residencia del Montepío, y cuntamos cola collaboración de Maximina, Manuel y Domingo; trés residentes que ficieron unos "cameos" na nuesa obra "P'allá del Más-Allá". Tuvo simpatiquísimo y la xente marchó encantada. 

Y depués de toes estes selmanes de trabayu, emociones, ésitos y nervios, solo nos queda por dicivos...

"Agradecí@s y emociona@os, solamente podemos dicir...¡¡Gracies por viniiiiiiiiiiir!!"

¡¡Cabera función de "P'allá del Más-Allá"!!

La prósima y cabera representación de la pieza teatral "P'allá del Más-Allá" del Grupu Teatru del CP Felechosa tendrá llugar el prósimu llunes 17 de xunu a les 11.30 hores nel Salón d'actos de la Residencia del Montepío en Felechosa. Esta función va ser perespecial porque, amás de pone-y el colofón final a la nuesa xira, habrá dellos "Cameos" de trés de los Residentes. Ye la última oportunidá de ver en direutu a estos cachu actores y actrices. ¿Vas perdételo?

¡¡Nuevu ésitu de "P'allá del Más-Allá"!!

Esti vienres pasáu a les 19.30 hores de la tarde, el Grupu Teatru CP Felechosa tábemos sobre les tables una vegada más. Con motivu de les fiestes de Caborana, ficimos una representación de la nuesa obra "P'allá del Más-Allá" na Xunta d'Iniciatives del pueblu, y una vegada más, foi un ésitu. Munches gracies dende equí por asistir y venir a pasar un bon ratu con nós. ¡Ah, y amás esta selmana salimos na prensa! Equí vos dexamos l'enllaz a la noticia. Gracies a Carmen Basteiro de la Nueva España pol interés.

Pincha equí pa ver la noticia de La Nueva España

Prósima función de "P'allá del Más-Allá"

El Grupu Teatru del CP Felechosa anunciamos nueva función de la nuesa obra "P'allá del Más-Allá". ¿Tovía nun la vistis y morréis de ganes? ¿Yá la vistis pero prestóvos tanto que queréis volver vela? ¡Nun hai problema! Esti prósimu vienres 7 de xunu a les 19.30 hores, na Xunta d'Iniciatives de Caborana tienes una nueva oportunidá. ¡Acompañáinos!

¡Esitazu na IV Gala de Teatru Escolar n'Asturiano!

Ayer a les 19.30 hores abríense les puertes del Auditoriu Teodoru Cuesta de Mieres pa recibir al públicu que vinía a ver la IV Gala de Teatru Escolar n'Asturiano qu'organizamos dende la escuela en colaboración cola Conceyalía de Cultura del Conceyu de Mieres. El Grupu Teatru del CP Felechosa yera'l primer en subise a les tables y facer les delicies de los asistentes que s'escacharraron de risa. Darréu, el Grupu Teatru del CP Returbiu continuaba col estrenu, ante'l gran públicu, de la so tamién premiada obra ¿Familia o trabayes? y cola que tocaron los corazoncinos del públicu. L@s nen@s tuvieron pletóric@s sobre l'escenariu y el públicu marchó encantáu. Tamién agradecer a Samuel Gradín, presentador y direutor d'Alderiques d'Asturies, que nos fixo d'anfitrión y conduxo la gala con munchu remangu. Y sobre too... ¡Gracies a tol@s que fuistis!

¡¡Nueva función de "P'allá del Más-Allá"!!

El Grupu Teatru del CP Felechosa tenemos el gustu d'aunciar una nueva función pa presentar la nuesa premiada obra "P'allá del Más-Allá". Tendrá llugar na IV Gala de Teatru Escolar n'Asturiano nel Auditoriu Teodoru Cuesta de Mieres. Xunto con nós tamién actuarán l@s neñ@s del Grupu Teatru del CP Returbiu presentando la so obra "¿Familia o trabayes?" La cita sedrá  a les 19.30 hores.

¿Vas perdétela?

¡¡Segunda función de "P'allá del Más-Allá" superada!!

Ayer, a eso de les ocho de la tarde, abriénse les puertes del Teatru Cine Carmen de Morea p'acoyer al públicu que venía a ver la segunda función de "P'allá del Más-Allá" y la que foi la primer destinada pa tolos públicos. Salió too perbién, a pesar de les males pasaes que nos xueguen a veces los nervios, y el públicu marchó encantáu. ¡Munches gracies a to@s por asistir! En breves, colgaremos el cartel de la prósima...

¡¡Nueva función de "P'allá del Más-Allá"!! en Moreda

El Grupu Teatru del CP Felechosa anunciamos una nueva fecha pa representar la nuesa obra "P'allá del Más-Allá". Esta sedrá'l prósimu xueves 16 de mayu a les 20.00 hores nel Teatru Cine Carmen de Morea. ¿Vas perdétela? ¡¡Ven a divertite con nós!!

¡¡Esitazu nel estrenu de "P'allá del Más-Allá"!!

Esta mañana, l@s escolin@s de 5º y 6º y la so mayestra Laura, estrenaron la so obra "P'allá del Más-Allá" ante l'atenta mirada d'un cientu d'escolin@s y maestros de dellos colexos del conceyu nel Teatru Cine Carmen de Moreda. Anque los nervios apretaron, sobre too, al entamu la función, les actrices y l'actorín fixeron gala del so "saber facer" y amuesaron con creces les sos dotes artístiques, quedando más que xustificaos los galardones obteníos nesti caberu Certame de Teatru Escolar. Dende equí, davos les gracies a tolos neñ@s y maestr@s que vos arrimastis y mos arropastis nesti día tan especial. Ensin dulda, esti foi un pistoletazu de la salida de la nuestra xira de luxu.