Vivencies: xuegos d'ayer, hoi y siempre

 Na actividá correspondiente al mes de xineru del Proyeutu Interxeneracional Vivencies tocó-yos a l@s Residentes facemos una visita na escuela. Aprovechemos pa facer un circuitín de xuegos tradicionales, de los que xugaron ell@s cuando fueron pequeñ@s y qu'inda hoi tienen presencia, anque ca vez menos. Los equipos formaos por neñ@s y residentes fixo l'actividá muncho más inclusiva, adautándose a tolos ritmos de los integrantes pa poder esfrutar toos por igual.

Siguimos compartiendo tiempu, siguimos compartiendo Vivencies.

¡Puxa l'Amagüestu!

 Esti martes tuvimos de folixa na escuela, celebrando'l tan tradicional Amagüestu. El día entamó con una divertía de Jose, el maestru de llingua, que nos cuntó cosines y nos fixo buscar personaxes mitolóxicos escondíos pela escuela; darréu vino otru jose, nesti casu un profesor xubiláu, qu'agora ye apicultor, a cuntanos una montonera coses perinteresantes sobre'l mundu l'apicultura, les abeyes y la miel; depués fiximos una manualidá bien prestosa d'una castañana molona; tamién tuvimos a la gueta l'Ayalga, revolviendo ente les fueyes seques de la nuesa viesca de decoración; en topando les ayalgues salimos a xugar los xuegos tradicionales: el comecastañes, el tiru soga, la carrera panoyes, la carrera de cuyar y castaña y la carrera sacos; y, pa finar, depués de tanta actividá entremos pa escuela a comer castañines calentines, bollinos preñaos y arremoyar el gargüelu con sidrina dulce. ¡Pasémoslo perbién! Equí vos dexamos unes fotos de la xornada. ¡Disfrutáiles!

¡Puxa l'Amagüestu Interexeneracional!

Ayer tuvimos una celebración anual perimportante: l'Amagüestu Interexeneracional. Ye interxeneracional porque lu celebramos colos vieyinos y vieyines que tan na Residencia del Montepío y ta enmarcáu nel nuesu proyectu conxuntu "Vivencies".

Amás, tuvimos la visita y participación perprestosa de l@s compañer@s de les escueles de Bello y Piñeres. Pa entamar tuvimos un miniconciertu de gaita y una esplicación de les partes d'esti instrumentu, a cargu d'Imanol, el maestru de música de Piñeres. Darréu, trabayemos pa investigar los aspectos más importantes de les dixebraes ferramientes que taben na esposición cola ayuda de los Residentes. Al acabar esta xera, entamó lo más divertío: los xuegos tradicionales. Tuvimos faciendo un circuitu per cinco xuegos tradicionales pa dempués, sentanos a reponer fuercies coles castañes y la sidrina dulce. Pasámoslo perbién. Equí tenéis un vídiu cola montonera fotos de l'actividá- ¡Qué vos preste!

 

¡¡Puxa l'Amagüestu Interxeneracional!!

Hoi tuvimos de celebración: ¡¡L'Amagüestu Interxeneracional xunto colos residentes del Montepío!! Depués de que María y Andrés abrieran l'actu col pregón, tuvimos nun taller perguapu coles filanderes de Trebeyos que nos aprendieron a tratar, filar y teñer llana. Depués preparemos los cucuruchos pa les castañes, pero enantes, xuguemos a dellos xuegos tradicionales. Al acabar yá nos pusimos a beber zusmiu mazana y comer castañes asaes. ¡Pasémoslo perbién! Esti amagüestu interxeneracional ta enmarcáu dientro del Proyeutu Vivencies que facemos dende la escuela cola Residencia. Equí vos dexamos unes fotos de la xornada. ¡Que vos presten!

Taller Xuegos Tradicionales

Esta selmana tuvimos un par de visites mui especiales, la d'unes señorines del Centru de Día de Morea, que vinieron a aprendenos a xugar a dellos xuegos tradicionales, a los que solíen xugar elles cuando yeren como nosotr@s. El martes tuvieron xugando col@s neñ@s d'infantil, 1º y 2º al "pasimisí" y a dos modalidaes diferentes del "pañelu"; y, el xueves col@s neñ@s de 3º,4º,5º y 6º, xugaron al pañuelu, a la comba y hasta fixeron maxa. Munches gracies a toes por venir a venos y dedicar parte del vuesu tiempu a aprende-yos coses tan guapes a los nen@s. Equí vos dexamos unes fotos de los dos díes. ¡Qué vos presten!