Ayer, últimu día d'escuela enantes de les merecíes vacaciones, tuvimos faciendo delles actividaes navidiegues bien prestoses. A primer hora fuimos a ver al Campal el nacimientu que Pepe, el nuesu vecín, fixera y nos convidara a dir esfrutar en compañía de les families y vecinos. Depués al llegar a la escuela tuvimos con Janco, un cuentacuentos que nos tuvo una hora cola boca abierta y les oreyes bien atentes. Darréu Lorena, la maestra d'infantil y coordinadora del nuesu proyeutu de reciclaxe, púnxonos unos curtiometraxes bien simpáticos pero con munchu mensaxe pa cola ecoloxía pa dempués facer unos adornos navidiegos con material recicláu. Acabantes de facer estes actividaes llegó una sorpresa bien prestosa a la escuela... ¡¡Papá Noel!! Que-yos traxo un regalín a tolos nen@s y nos fixo de secretariu pa entregar los premios a los másimos llectores y ganaores del concursu de postales. Cuando Papá Noel marchó, les families, los neñ@s y los maestr@s esfrutamos xuntos d'una chocolatada y llambionaes navidiegues. Equí vos dexamos un vídiu coles semeyes de la xornada y aprovechamos pa deseyavos dende equí... ¡¡Mui felices fiestes y prósperu añu 2019!!
No hay comentarios:
Publicar un comentario