Güeli, ¿qué comemos?

 El 22 de xunu fuimos convidaos a una actividá interxeneracional bien prestosa celebrada nel Centru de Día de Morea. Consistía en dir a preparar un par de recetes un poco peculiares... Empanada de carne de Cordobeyu y Tata de Queso de lleche de Gamusina. L@s neñ@s ellaboraron les recetes cola ayuda de les usuaries del Centru de Día y depués visitáronnos los únicos pescaores con licencia pa pescar al Cordobeyu y les últimes ordeñaores de Gamusina, que nos esplicaron en qué consiste'l so trabayu. Una actividá perguapa y que, amás, salió nel programa de la TPA "Siempre al día".

Equí vos dexamos l'enllaz del programa, a partir del minutu 35:

CP Felechosa en Siempre al Día

Teatru n'asturiano

 Ayer tuvimos la suerte de poder ver una obra teatru bien prestosa: "Amanda y les castañes máxiques" nel Cine Carmen de Morea. Rímonos abondo y pasémoslo pipa. Al finar, tuvimos la suerte de dir a sacar una foto colos actores y actrices y charrar un pocoñín con ell@s. 

¡Laura A. y Laura O. premiaes nel Concursu de los Humanitarios de San Martín!

Les nueses alumnes de sestu, Laura Alonso y Laura Ordóñez, resultaron premiaes nel Concursu de los Humanitarios de San Martín col trabayu sobre'l Camín de Santiago nel Conceyu d'Ayer. Hoi, acompañaes por Héctor, el maestru de Llingua, fueron a la Gala d'Entrega de Premios celebrada nel IES de Morea.

¡Norabona Laures!

¡¡Segunda función de "P'allá del Más-Allá" superada!!

Ayer, a eso de les ocho de la tarde, abriénse les puertes del Teatru Cine Carmen de Morea p'acoyer al públicu que venía a ver la segunda función de "P'allá del Más-Allá" y la que foi la primer destinada pa tolos públicos. Salió too perbién, a pesar de les males pasaes que nos xueguen a veces los nervios, y el públicu marchó encantáu. ¡Munches gracies a to@s por asistir! En breves, colgaremos el cartel de la prósima...

¡¡Nueva función de "P'allá del Más-Allá"!! en Moreda

El Grupu Teatru del CP Felechosa anunciamos una nueva fecha pa representar la nuesa obra "P'allá del Más-Allá". Esta sedrá'l prósimu xueves 16 de mayu a les 20.00 hores nel Teatru Cine Carmen de Morea. ¿Vas perdétela? ¡¡Ven a divertite con nós!!

¡¡Esitazu nel estrenu de "P'allá del Más-Allá"!!

Esta mañana, l@s escolin@s de 5º y 6º y la so mayestra Laura, estrenaron la so obra "P'allá del Más-Allá" ante l'atenta mirada d'un cientu d'escolin@s y maestros de dellos colexos del conceyu nel Teatru Cine Carmen de Moreda. Anque los nervios apretaron, sobre too, al entamu la función, les actrices y l'actorín fixeron gala del so "saber facer" y amuesaron con creces les sos dotes artístiques, quedando más que xustificaos los galardones obteníos nesti caberu Certame de Teatru Escolar. Dende equí, davos les gracies a tolos neñ@s y maestr@s que vos arrimastis y mos arropastis nesti día tan especial. Ensin dulda, esti foi un pistoletazu de la salida de la nuestra xira de luxu.